Proiektu kulturalarekin batera, eraikinean ekosistema kulturala osatzen duten proiektu eta erakundeak ere bizi dira: Donostia Zinemaldia, Etxepare Euskal Institutua, Euskadiko Filmategia, Kutxa Fundazioa eta Zineuskadi. Gainera, proiektu bereziak garatzen dituzten ekimen pribatuek ere ekarpena egiten diote ekosistema horri. Eraikinak erabilera, ekimen eta eragile ezberdinak hartzen ditu, kultur proiektua ardatz nagusi duela.
DONOSTIA ZINEMALDIA
Donostia Zinemaldiak, 1953an sortua, sail desberdin hauek ditu: Sail Ofiziala, Zuzendari Berriak saila, Horizontes Latinos saila, Zabaltegi, Perlak, Zinemira, Savage Cinema, Culinary Cinema eta Nazioarteko Zinema Ikasleen Nazioarteko Topaketa. Bi atzera begirako ere badaude: klasiko bat eta tematiko edo garaikide bat. Zinemaldiaren Industria Sailak, The Industry Clubak, Latinoamerikako eta Europako zinematografietarako erreferentziako plataforma bilakatzeko apustua egin du hasieratik. Horretarako, honako jarduerak antolatzen ditu, Europa-Latinoamerika Koprodukzio Foroa eta Zinema Eraikitzen, besteak beste.
Informazio gehiago: Donostiako Zinemaldia
ETXEPARE EUSKAL INSTITUTUA
Euskara eta euskal kultura munduratzea helburu duen Eusko Jaurlaritzaren mendeko erakunde publikoa da. Tabakalerako egoitza berritik kulturaren enbaxadore lanak egiten jarraituko du, euskal hizkuntza eta sorkuntza hedatzeko konpromisoari helduz. Horretarako, arte diziplina guztiak -literatura, antzerkia, dantza, zinea, musika, arte plastiko eta ikusizkoak…- sustatzeko ekintzak eta programak bultzatzeari eta nazioarteko erakunde eta eragile ezberdinekin elkarlanean aritzeari eutsiko dio. Institutuak, gainera, Euskara eta Euskal Kultura irakurletzak eta katedrak sortu ditu nazioarteko unibertsiteetan, euskal ikasketak nazioarte mailan txertatuz.
Informazio gehiago: Etxepare Euskal Institutua
EUSKADIKO FILMATEGIA
Tabakalerako egoitza berrian Euskadiko Filmategiak ikus-entzunezko ondarearen ikerketa, berreskuratze, artxibo, kontserbazio, zaharberritze eta zabalkunde lanekin jarraituko du. 1978. urtetik zinema bere osotasunean baina bereziki euskal zinemaren ikerketari eskaintzen dizkio ahalegin guztiak; baita ere, kulturalki edo historikoki duten garrantziagatik kontserbatzea merezi duen zinemari buruzko dokumentazioa eta material zinematografikoak bildu eta zaintzeari.
Informazio gehiago: Euskadiko Filmategia
KUTXA FUNDAZIOA
Kutxa Kulturen espazioak, eskaintza kulturala Gipuzkoa osora zabaltzeko azpiegitura eskaintzen duen fabrikaren espirituarekin bat egiten du. Bizikidetza kulturala sustatzeko gune gisa eratuko da. Eragile kultural berriak eta artista berrien lanak ikusgai jartzeko aukera gune bat izango da. Kutxaren beraren programak burutzeko kokalekua izateaz gain, goi mailako erakusketa desberdinen kokalekua ere izango da.
Informazio gehiago: Kutxa Kultur
ZINEUSKADI
Zineuskadi kultura ohiturak sustatuz, ikusentzuteko euskal sektorearen promoziorako plataforma publikoa da. Zineuskaditik egitasmo hauek bultzatzen dira:Zinema euskaraz, Europa Creativa Desk Mediaren bulegoaren kudeaketa eta diru-laguntzak bai aretoei eta baita publizitate eta zinemaren promoziorako laguntzak ere.
Informazio gehiago: Zineuskadi
EQZE
Gipuzkoako Foru Aldundiak sortua, Elías Querejeta Zine Eskola zinemaren inguruko pentsamendua, praktika esperimentala eta berrikuntza pedagogikoa eskaintzen duen nazioarteko formakuntza zentro bat da. EQZE zinemaren hiru aldien eskola da, haren jatorrian izan diren hiru erakundeen ikerketa eta lan eremua, hain zuzen, iragana (Euskadiko Filmategia), oraina (Donostia Zinemaldia) eta etorkizuna (Tabakalera) direlako. Eskolaren irakaskuntza-proiektua graduondoko hiru programa hauek islatzen dute: Artxiboa, Komisariotza eta Sorkuntza. Eskolaren xedea da begirada integrala duten eta errealitate zinematografiko berriak sortzeko gai diren zinemagileak sustatzea.