Hezkuntza

Hezkuntza proiektuaren helburu nagusia Tabakalerako kultur proiektua, eragile eta testuinguru ezberdinekin erlazioan jartzea da. Mediazioa, ikerketarako eta ezagutza sortzeko tresna gisa ulertzen du. Horrela, garatzen dituen programak, lekuan lekuko harreman eredu eta sorkuntza moduekin elkarlanean eraikitzen dira. Errealitate bakoitzaren erritmo eta dinamikara egokitzen gara, sarearen filosofiarekin lan eginez eta ezagutza kolektiboak ekoiztuz.

Praktika horiek beti, ekoizpen kultural garaikideen eta pedagogien gainean pentsatzea baimentzen diguten ikerketa eta gogoeta-prozesuekin batera doaz.

Aipatzekoak

Zoom. Bideo Laborategia

Beste urte batez aurrera jarraitzen dugu Zoom proiektuarekin, ikus-entzunezkoetan, kultura garaikidean eta artean sakontzeko interesa duten gazteen lantaldearekin. 16 eta 21 urte artean badituzu, zinema ikusi eta egitera etorri nahi baduzu, zeure interesak eta kezkak azaldu nahi badituzu... hau da zure lekua!

Irakaslegoarekin programa

Topaketa hauek elkarrekiko ikasketa prozesuak sortu, dauden premiak eta interesak ezagutu eta hezkuntza tresna irekiak ahalbidetzeko espazio moduan ulertzen ditugu. Horretarako, elkarrizketa esparru bat eskaintzen dugu hezkuntzaren eta kultura garaikidearen artean.

Hiria Hackeatu

12 eta 17 urte arteko gazteei zuzendutako Hiria Hackeatu hacker eta maker filosofietatik abiatzen da. Lantegi bakoitzean parte hartzen duen gazte taldearekin batera, ingurumena arakatzen dugu begirada kritiko batetik, eta eraldaketak proposatzen ditugu elkarlanean eta teknologia digitalen laguntzaz sortutako artefaktuen bidez.

0-6 Bizi!

0-6 bizi! 0 eta 6 urte bitarteko haur eta familiei zuzendutako proiektua da. Bere helburuen artean daude: adin tarte honetako haurren heziketa eta sormena lantzea, zein gurasoen intereseko gaiak jorratzea.

Archiveras

Archiveras proiektua ezagutzaren eraikuntza kolektiboa aktibatzeko sortu den espazioa da, Tabakalerako langile ohi eta berrien topaketa batzuetatik sortua.

Kamaleoiak gara!

Kamaleoiak gara! txiki eta helduei zuzendutako jarduera programa da. Haurrek heldu batek lagunduta hartuko dute parte: ama eta alaba, osaba eta iloba, amona eta biloba, elkarrekin erakusketekin, antzerkiaz edota musikaz gozatuz.

Ikastetxeak eta elkarteak

Tabakaleraren eta hezkuntza komunitatearen artean harreman iraunkor bat ahalbidetzeko asmoz, zenbait programa proposatzen ditugu askotariko denbora eta premietara moldatu ahal izateko, besteak beste: lehen eta bigarren hezkuntzako eta batxillergoko taldeekin eta elkarteekin ibilbide-tailerrak, epe ertain eta luzeko ko-diseinuan oinarritutako programak, irakaslegoarekin programa... Era horretan, espazio publikoan egindako interbentzioak, lantegiak, zine saioak, jarduera esperimentalak edo erakusketetan barrena paseoak eginez, gaur egungo sorkuntzan sakonduko dugu.

Informazio gehiago